Innanlandsstarf
Mikil aukning á aðsókn í Frú Ragnheiði á Akureyri
16. september 2022
Frú Ragnheiður á Akureyri fékk fleiri heimsóknir fyrstu átta mánuði þessa árs en en allt árið 2021.

Heimsóknirnar fyrstu átta mánuði ársins 2022 í Frú Ragnheiði á Akureyri, skaðaminnkandi úrræði Rauða krossins fyrir fólk sem notar vímuefni í æð, eru orðnar fleiri en allt árið 2021. Fyrstu átta mánuði ársins voru heimsóknirnar í þjónustuna á Akureyri 262, en þær voru 195 allt árið 2021. Einstaklingarnir að baki heimsóknunum eru orðnir 32 á þessu ári á móti 23 yfir allt árið í fyrra, sem er aukning um tæp 40% milli ára.
Frú Ragnheiður er verkefni sem flestir landsmenn þekkja vel. Frú Ragnheiður sinnir grunn heilbrigðisþjónustu, nálaskiptaþjónustu og sálrænum stuðningi en verkefnið er starfrækt innan Rauða krossins á þremur stöðum á landinu, Akureyri, Höfuðborgarsvæðinu og á Suðurnesjum.
Meira traust og betri þjónusta
Hópstjórar Frú Ragnheiðar á Akureyri (Berglind Júlíusdóttir og S. Edda Ásgrímsdóttir) telja aukninguna í verkefninu ekki stafa af því að fleiri noti vímuefni í æð, heldur sé skýringin sú að nú þegar verkefnið hefur verið starfandi í rúmlega fjögur og hálft ár hafi það byggt upp traust meðal þeirra einstaklinga sem nýta sér þjónustuna. Auk þess hefur þjónustan verið efld verulega síðastliðið ár með aukinni heilbrigðisþjónustu, dreifingu á lyfinu Naloxone (sem notað er til að draga úr áhrifum of stórra skammta af ópíóðum) og með tilkomu samstarfs við veitingahús á Akureyri sem gefur skjólstæðingum heita matarbakka þrisvar í viku.
Frú Ragnheiður á Akureyri er með þrjár vaktir á viku, á mánudögum, miðvikudögum og fimmtudögum milli klukkan 20:00 – 22:00. Hægt er að hafa samband á þeim tíma í síma 800 1150. Fullum trúnaði er heitið.
Fréttir af starfinu
Fréttayfirlit
Fjármögnun neyslurýma áskorun um alla Evrópu
Innanlandsstarf 25. júní 2025Þrátt fyrir að neyslurými fyrir vímuefni hafi fyllilega sannað gildi sitt gagnvart bæði einstaklingum og samfélögum glíma þau við sama vandamálið, hvort sem þau eru í Barcelona eða Borgartúni. Starfsfólk skaðaminnkunarverkefna Rauða krossins sótti upplýsandi ráðstefnu í Strassborg.

Nýtt forvarnarátak: Öryggi barna í sundi
Innanlandsstarf 23. júní 2025„Drukknun er algengari en flestir halda og stundum er því talað um hinn þögla faraldur,“ segir Hildur Vattnes Kristjánsdóttir, teymisstjóri skyndihjálpar hjá Rauða krossinum. Félagið hefur hleypt af stokkunum fræðslu- og forvarnarátaki um öryggi barna í sundi í samvinnu við Reykjavíkurborg og Samtök forstöðumanna sundstaða á Íslandi.

Sigríður tekur við formennsku af Silju Báru
Almennar fréttir 19. júní 2025„Ég tek við starfi formanns með mikilli auðmýkt, tilhlökkun og virðingu fyrir öllum þeim sem starfa fyrir Rauða krossinn, bæði sjálfboðaliðum og starfsfólki,“ segir Sigríður Stefánsdóttir, nýr formaður Rauða krossins á Íslandi.