Nýjum söfnunarkössum Rauða krossins fyrir fatnað og annan textíl hefur verið komið fyrir við fimm Bónusverslanir á höfuðborgarsvæðinu. Samtals eru kassarnir því á sjö stöðum á svæðinu og stefnt er á frekari útbreiðslu á næstu misserum.

Á höfuðborgarsvæðinu óskar Rauði krossinn aðeins eftir heilum og hreinum fatnaði, skóm og fylgihlutum sem og heimilistextíl s.s. gardínum, rúmfötum, garni og efni til föndurgerðar. Þetta skal setja í kassana í lokuðum pokum. Allt sem safnast verður flokkað af kostgæfni og selt í verslunum Rauða krossins í Reykjavík eða nýtt í ýmis mannúðarverkefni Rauða krossins.

Engar breytingar voru gerðar á söfnun textíls annars staðar á landinu. Enn er t.d. tekið á móti öllum textíl á starfssvæði Eyjafjarðardeildar Rauða krossins.

Rauði krossinn á höfuðborgarsvæðinu afþakkar hraðtískufatnað frá kínverskum netverslunum á borð við Temu og Shein þar sem félagið vill ekki ýta undir ofneyslu og sóun. Auk þess hefur verið sýnt fram á að of mikið magn eiturefna geti leynst í fötum frá þeim.

Fyrir var Rauði krossinn með tvo söfnunarkassa á höfuðborgarsvæðinu; við höfuðstöðvar Rauða krossins í Efstaleiti 9 og við fataflokkunarmiðstöð félagsins á jarðhæðinni í Skútuvogi 1C. Þeir verða áfram á sínum stað.

Nýju kassarnir eru við eftirtaldar Bónusverslanir:

Kópavogur: Smáratorg

Hafnarfjörður: Helluhraun

Garðabær: Miðhraun

Reykjavík: Fiskislóð (Grandi) og Norðlingaholt.

Að auki er hægt að koma með framlög í fatamiðstöðina í Skútuvogi milli klukkan 9 og 15 mánudaga til fimmtudaga og 9-14 á föstudögum og afhenda starfsmanni eða sjálfboðaliða.

Sjá kort yfir alla söfnunarstaði hér. 

„Með fataverkefninu vill Rauði krossinn leggja sín lóð á vogarskálar hringrásarhagkerfisins en fatasalan er einnig mjög mikilvæg fjáröflunarleið fyrir félagið,“ minnir Guðbjörg á. „Þess vegna skiptir okkur miklu máli að geta haft úrval af góðum flíkum, að sjálfsögðu heilum og hreinum, til sölu.“

Fatakassar í alfaraleið

Mikið lán var fyrir Rauða krossinn að fá Bónus í lið með sér varðandi staðsetningu nýju fatakassanna. Verslanir Bónus eru í alfaraleið fólks sem auðveldar söfnunina verulega.

„Það er okkur hjá Bónus sönn ánægja að taka þátt í þessu mikilvæga verkefni með Rauða krossinum,“ segir Björgvin Víkingsson, framkvæmdastjóri Bónuss. „Við vitum að endurnýting og sjálfbærni skiptir viðskiptavini okkar miklu máli og með nýju söfnunarkössunum viljum við bæði styðja það góða framtak og styrkja mikilvægt mannúðarstarf Rauða krossins í leiðinni.“

Rauði krossinn mun leggja sig allan fram við að tæma söfnunarkassana svo þeir verði ekki yfirfullir. „Við ætlum að gera þetta eins vel og við getum,“ segir Guðbjörg.

Hvar enda fötin þín?

Endurnýting á fatnaði og fylgihlutum er sífellt að aukast og verða vinsælli. „Við hvetjum alla til að huga að gæðum frekar en magni þegar föt eru keypt og líka að hugsa um hvar flíkurnar eiga eftir að enda,“ segir Guðbjörg. „Við finnum að fólk vill koma til okkar góðum fatnaði – að hann fái framhaldslíf hjá öðrum. Þess vegna höfum við sett upp fleiri söfnunarkassa svo að fólk geti gripið með sér valin föt í poka í næstu Bónusferð. Þannig getur fólk tekið þátt í þessu verkefni með okkur og verið í liði með mannúðinni í leiðinni.“