Eftir að kennarinn Guðrún Salome Jónsdóttir lét af störfum fyrir nokkrum árum langaði hana til að halda áfram að láta gott af sér leiða fyrir samfélagið. Hún hafði kennt ensku á grunn- og síðar framhaldsskólastigi í áratugi, síðast í Menntaskólanum í Kópavogi, í sínum heimabæ. Er hún hafði kvatt nemendurna í síðasta sinn var hún orðin ákveðin í því að bjóða krafta sína fram til sjálfboðastarfa. Og þá kom Rauði krossinn fljótt upp í hugann.

Guðrún sótti um að gerast sjálfboðaliði og var tekið fagnandi hjá félaginu, enda alltaf eftirspurn eftir viljugum og áreiðanlegum sjálfboðaliðum. Ekki leið á löngu þar til hún var mætt til starfa í einni af verslunum Rauða krossins í Reykjavík. „Ég fékk góða handleiðslu frá reyndum sjálfboðaliðum,“ segir hún um fyrstu skrefin í starfinu.

Sækja um sem sjálfboðaliði

Þetta var árið 2019 og nú, að verða sjö árum síðar, tekur hún enn vaktir í búðunum, aðallega þeirri sem er að finna í Kringlunni. Hún aðstoðar og afgreiðir viðskiptavini sem eru komnir til að gera góð kaup á notuðum fatnaði og leggja þar með sín lóð á vogarskálar mannúðarstarfs og hringrásarhagkerfisins. „Ég hef fengið mikla ánægju af starfinu,“ segir Guðrún.

Rauði krossinn rekur fataverslanir með notaðan fatnað, skó og fylgihluti, og stundum ýmislegt annað, víða um land. Í Reykjavík eru verslanirnar fjórar: Í Mjódd, Kringlunni og á tveimur stöðum við Laugaveg.

„Ég mæli með því að fólk gerist sjálfboðaliðar,“ segir Guðrún, „því það er mjög gefandi“.

Hér getur þú kynnt þér verkefni Rauða krossins, séð í hver þeirra vantar nú sjálfboðaliða og sótt um að gerast sjálfboðaliði.